ពោធិសាត់៖ ដោយមើលឃើញការលំបាករបស់យុទ្ធជន កងកម្លាំងចម្រុះគ្រប់ប្រភេទដែលបានចូលរួមជួយរុករកឧទ្ធម្ភាគចក្រ និងអាកាសយានិកដែលបានបាត់កាលពីថ្ងៃ១២ ខែកក្កដាកន្លងមកនេះ ក្នុងឋានៈជាប្រធានកាកបាទក្រហមកម្ពុជាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានឧបត្ថម្ភថវិកា៤រយលានរៀលដើម្បីចែកជូនកងកម្លាំងចម្រុះទាំងអស់ដែលគិតក្នុងម្នាក់គិតប៉ាន់ស្មានបានប្រមាណ៤០ម៉ឺនរៀលក្នុងម្នាក់។ នេះគឺជាអះអាងរបស់លោក គន់ គីម អនុប្រធានទី១ នៃគណៈកម្មការជាតិគ្រប់គ្រងគ្រោះហន្តរាយ នៅក្នុងសន្និសិទសារព័ត៌មាននៅព្រឹកថ្ងៃទី៣០ ខែកក្កដា ឆ្នាំ២០២៤នេះ។  

ក្នុងនាមសម្តេចធិបតីប្រធានគណៈកម្មការជាតិគ្រប់គ្រងគ្រោះហន្តរាយ និងក្នុងនាមលោកជាអ្នកសម្របសម្រួលជាមួយនឹងភាគីពាក់ព័ន្ធ លោក គន់ គីម បានកោតសរសើរ និងថ្លែងអរគុណចំពោះបញ្ជាការសមរភូមិមុខដែលដឹកនាំដោយនាយឧត្តមសេនីយ៍ ឥត សារ៉ាត់ និងកម្លាំងចម្រុះរបស់កងយោធពលខេមរភូមិន្ទដែលមានកងទ័ពជើងគោក ជើងអាកាស កម្លាំងចម្រុះរបស់ខេត្ត មន្ត្រីរាជការ គ្រូពេទ្យ រួមទាំងប្រជាពលរដ្ឋផងដែលបានចូលរួមចំណែកជាមួយនឹងបញ្ជាការសមរភូមិមុខធ្វើការរុករកក្នុងរយៈកាល១៨ថ្ងៃកន្លងមកនេះ។ លោកបានថ្លែងអំណរគុណចំពោះអភិបាលខេត្តពោធិសាត់ដែលបានរួមចំណែកយ៉ាងសកម្មនិងផ្ដល់ស្បៀងអាហារ សម្ភារៈ រួមជាមួយកងកម្លាំងរបស់ខេត្ត ស្រុក ឃុំ និងប្រជាជនដែលស្គាល់ព្រៃដើម្បីចូលរួមសហការណ៍។ 

លោក គន់ គីម ក៏បានថ្លែងអំណរគុណចំពោះថៅកែយន្តហោះ ក្រុមហ៊ុនហេលីស្តារ ខេមបូឌា ដែលបានផ្តល់យន្តហោះមួយគ្រឿងជួយធ្វើកិច្ចការងាររុករកនេះ។ លោកបានបញ្ជាក់ថា យន្តហោះរបស់កងទ័ពអាកាសក៏មានដែរ ក៏ប៉ុន្តែធំ ដូច្នេះការចល័តធ្វើសកម្មភាពមានការលំបាក។ លោក គន់ គីម បានចាត់ទុកថានោះ គឺជាគុណសម្បត្តិដែលក្រុមហ៊ុនបានខិតខំធ្វើការរុករក ហើយបានរកឃើញ។ ក្នុងនាមគណៈកម្មការជាតិ លោកបានសម្ដែងការកោតសរសើរនិងអរគុណចំពោះអ្នកបើកបរនិងគ្រូអ្នកបើកបរដែលខិតខំធ្វើពលិកម្មយ៉ាងធំធេងដើម្បីរកយន្តហោះបាន៕